కొత్త దు:ఖంతో, కొత్త నిశ్శబ్దంతో
ఒక అపరిచితుడు నాలోకి ప్రవేశిస్తాడు
ప్రేమలోంచి వొక దూరం దగ్గరై నాలోకి
హత్తుకుంటుంది
వొక రెండవ వాడు నాలోంచి బయటి
వర్షంలోకి దూకుతాడు
నా పాత జ్ఞాపకాలూ ,శిక్షిత ఆలోచన్లూ
పదదళంలా వాడిని వెంబడిస్తాయ్
నా అపరిచితుడే నేనయ్
కాలాన్ని అధిరోహిస్తాను
గాలికన్నా వేగంగా పరుగులెత్తే నామీద
అనేక వలలు ముసురుకొంటాయ్
ఉత్తరం వేపునుంచి వొక బాణం విసురుగా
గుండెల్లోకి దిగుతుంది
టీవీ న్యూస్ లో నా శవపు పెదాల మీది
చిరునవ్వు మాత్రం అందరినీ దిగ్భ్రాంతి
పరుస్తుంది
....................................................31/08/2010 9.38 am (home)
