నాలోపలి రక్తకణాల్ని మేల్కొలిపిన ఆమె మాంత్రిక స్పర్శ... |
ఆమె దేహపు పరిమళం
సాలె గూడులా నా మీదికి అల్లుకుంటుంది
నేను సమస్త తెలివినీ వదలి పెట్టి
అనేక పొరల మాటున దాగిన నా ఆత్మను
పునః కనుగొంటాను
నా లోపలి రక్త కణాల్ని మేల్కొల్పిన
ఆమె మాంత్రిక స్పర్శ.
నేల మీదికి పెనవేసుకునే
ఆకాశపు మోహపు నీడలా
నేను ఆమెని నా సమస్త జీవితపు
రహస్య కాంక్షతో నాలోకి తీసుకుంటాను .
సముద్రం వంటి ఆమె నిగూఢ సౌందర్యం
నన్ను ఆక్రమించినపుడు
కాలాలుగా ప్రవహించిన నాలోపలి చరిత్ర
మరణిస్తుంది
నేనొక పూర్వ దేహాన్ని ధరించి
వొక ఆదిమ గుహలో కళ్ళు తెరుస్తాను.
మాయల , మోసాల,నీతుల అపరిచిత భ్రమలు
సుదూరపు గగనంలో చుక్కలవలె మెరుస్తుంటాయి
నేను మాత్రం
నాలోయ లోపలి ప్రతి చెట్టు మీద
బిత్తలిగా పుష్పిస్తాను
..............................................దాము 5/10/2011 2am (home Hyderabad)
No comments:
Post a Comment