నిల్ బాలన్స్

జీర్ణ పర్ణ శాల వేపుగా గొడుగు పట్టుకుని ఎవరు వచ్చేటట్లు లేదు ...

కాలం ఎడారిలో జ్ఞాపకం 

ఒంటె నడిచిపోయిన  గుర్తులు మినహా

ఏమీ మిగిలేటట్లు లేదు

ఎవరూ  వచ్చేటట్లు లేదు 

ఏమీ జరిగేటట్లు లేదు 

అమెజాన్ నదిలా వంకర్లు తిరిగిన ఆలోచన 

ఏ నాగరికతనూ ఆహ్వానించేటట్లు లేదు 

రాయలసీమ నెర్రెలు వారిన భూమి మీద

ఏ వర్షం కురిసేటట్లు లేదు 

చూచినంత మేర డ్రైలాండ్  విస్తీర్ణపు దుమ్ము 

ఇప్పట్లో   మణిగేటట్లు లేదు 

ఎవరూ వచ్చేటట్లు లేదు

ఏమీ జరిగేటట్లు లేదు

అమనిషత్వపు ఆకాశం నుంచి 

అబద్ధాల కుండపోత వర్షంలో 

తడుస్తున్న ఈ జీర్ణ పర్ణశాల వేపుగా 

గొడుగు పట్టుకుని ఎవరు వచ్చేటట్లు లేదు

తడి తగిలేటట్లు లేదు 

ఏమీ జరిగే జరిగేటట్లు లేదు 

("ప్రవాహ గానం" నుండి )